Din l'pieu d'éne glaine

Ch'est dés droles hein chés artisses . Os pouroéte ti vouzote rester inclaner din ein' sarcophage durant 8 jours ? Ben li i l'o foait ...Achteure i l'est au Palais de Tokyo à Péris ; pi qué lubrie qu'i li prind ! I l'o décidé d'couver inne doujaine d'oeus d'glaine dvant chés gins qu'is l'débéy'te * . I réstro conme cho dusqu'a temps qué ch'l oeu i craque ....A moins' qu'a seuche li qu'i craque edvant ! Os l'sairez din 26 jours .

Stapindant i l'o prévnu chés gins qu'is l'érguette , qu'i vouloait du silénche : Si i nn'o un seu* qu'i POUSSIN crie i s'rin-va rondébilis à ch'pouiller *

*Débeyer = Regarder avec insistance
*Seu = seul
*Pouiller = Poulailler

Ch'est mie a un viu sinche qu'oz apprins à grigner

Cécilia 19 ans d'age al est sortie d'prison . Soin , Cécilia cha n'est mie inne pouillette , nan ch'est un chimpanzé . Qué pécavie qu'i prind a chés gins d'bailler dés tchots noms d'gins à dés bétails !!
Et TCHITA ch'est du bren ...!
Tours* est t-i qu'Cécilia al étoait din un zoo mon chés Argeintins , mais al étoait dévnue langreuse* ; a n"mingeoait pus ; al n'avoait pus gout à rien . I falloait agir , cho'd décision pér la justice al o té prinse ed déliberer Cecilia pour l'erlacher din eune réserve naturelle au Brésil
Pér qué saint* qu'i n-y éroait qu'chés honmes qu'is pourroait't quitter leu prison edvant qu'leu peinne al seuche finite ?
Ch'est inne victoére pour chés chimpanzé , autant vos dire qu'is ont la "banane " ...!!


*Tours = Toujours
*Langreuse = Chétive
*Pér qué saint = Par quel saint = pourquoi faire

Chauffeur présidintielle

Feut voter , feut voter !!... Est pus simpe à dire qu'a foaire . Ecmint qu'is front chés gins din chés titchouts villaches qu'is n'ont poin d'autos et ouéche qu'i n'y-o poin d'autobus ; sin compter qu'is pourroait'té coér habiter a ch'bout dé ch'villache a chonq ou six lius dé ch'burieu d'votache ! Is vont qua -minme poin y-aller à pince !

In Bretagne n'y-o un méneu d'gins* qu'i l'o yeu l'idée ed tringbaler chés habitants inter chés 2 tours ed la présidintielle pi sans leu dminder un dar .

Eune foés saqué leu riquimpéte* da l'diminche is n'éront foque qu'à téléphonner à ch't honme qu'i varro z-zés queurs pour qu'is voaich'té déposer leu bulletin din l'urne .


*méneu d'gin = Employé ici pour Taxi
*Riquimpéte = Redingote

"Patte-ternité"

Éne foés n'est poin "costume" min tite i n'son.ne poin vraimint Picard , mais j'él treuvoais fin rétus .
Os rêvez d'eune  ésmainne ed congé in ramindo* ? Ch'est simpe conme bonjour .

Amon chés grands-Bretons* sartaines interprinses is offt'te à leu z'ouvériers sécants jours d'érpos si is adop'te un bétail , surtoute si ch'est un jonne .
Ch'est pour qu'i l'euche él temps d'érperer sés agis * pi d's habituer à vouzote .
Ch'est bien , tout l'monne n'él foait poin !  Quanjou qu'oz voéro cho in France ?

*In ramindo = En supplément
*Grands-Bretons = Les Anglais
*Sés agis = Les pièces de la maison

Coeuchie d'porcelaine

Ch'est à n'poin i croére ; pour mi qu'din 20 ans chés automobiles is n'éront pus leu phares ! A coeuse qué j'vos dit cho ? N'y-o inne intérprinse* à Limoges qu'al utilise 30% d'chés restes ed cho'p porcelaine pou qu'oz ni voéche miu pér nuit !

Vlo ichi un inrobé* qu'i l'est pus intérligént qu'sartains ...Li , i réfléchit . Sié ,i réfléchit cho'l leumiére ; mais feudroait t-i coér qu'i seuche achuchonné aveuc éne éclairage éspecial , a intinde dire qu'a froait foaire granmint d'économie !

Marchez , in attindant z'z économies i vo falloér déhanser* tous chés potieus lumineux ézistant pour chés nouvieus ...Guette bin chés impots !! 

*Inrobé = Enrobé
*Déhanser = Démonter

Quoé qu'al attind ?

Quoé qu'oz attind a l'veille ed sés chint ans ? os savez ch'que ch'est qu' attinde ? Oz attind ch'train quant qu'oz est su ch'quaï . Ch'est vagances quant qu'oz est tchot . L'értaite quant qu'oz est viux . Un éfant quant qu'oz est mérié . Oz attind tojours quétchose din la vie .

Mais lo ; a ti du sén d'vouloér s'n aller au violon* én fuche qu'eune nuit ? ...Ma pinse ; ch'est  cho qu'inne Hollandaise ed 99 ans d'age al rêvoait d'foaire edvant d'mourir . Bé , a n'est poin aisié , i l'o fallu qu'al foaiche dintier* chés cadoreux un rute momint edvant qu'is s'décid'te éd'l inclaner* pour inne nuit mon ch'comissariat , pi menotée coér ! ....Bon ben , cho ch'est foait !!!

*Au violon = En prison
*Dintier = Taquiner , provoquer
*Inclaner = Enfermer

Muche tin tchu vlo ch'garde

Conme i n-y avoait rien d'bien racachant din m'gazette pi qu'j avoais chonq minutes edvant mi , j'su t'aller ziuter din 20 minutes (chu jornal) ... A coér été bél -é-rade* , passé deux troés billets ej voés un tchu !!! Sié , eune poaire ed fésse ed fenme
Ech'tite i disoait : Procession d'célébrités su chés tapis rouges ; " in side butt " Side butt ??? Conme j'én su mie un crack din l'langue ed " CHAQUEU-SPÉHARE "* ej buque pour vir , pi lo j'apprins qu'chu fameuw side butt équ'ch'est méniere ed torner sin tchu do'f façon qu'oz in voéch' qu'el mitan . Bé , j'n'in su résté su l'tchu !Mi qu'i croéyoais vir cho'l leune ...j'n o vu qu'un quartier .

Attindez ch'est poin toute i nn'o coér inne sécant d'séants . Tours* in Inglés pou n'poin canger cha s'appele " El gliter body"
Adon ch'coup chi poin quéstion d'mitan , os voéyez toute , infin casi pasque leu tchus i est acoufté d'paillettes pi d'pérles pour qu'leu popotin is seuch'te inlluminés conme no sapin d'Noé !
Nan mais , oz voéro d'toute os savez ! Et vouzote os éte ti prét a vos papiner* d'paillettes pour éte a l'mode , el tchu su la commode !!


*Bel-é-rade = Vite
*Chaqueu-spéhare = Shakespeare
*Tours = Toujours
*Papiner = Coller

Un flamént rose poin d'trop tchuit

Minme si ch'tite ed min billet i préte à rire , j'croés qu'i veut miu n'in braire dé ch't histoére lo !

feut i éte déchindu rutmint bos pour én'n arriver la ! o bien avoér éne faim d'leu , aglaver* ; oué probabe . Mais os m'avourez qua-minme eq quante oz habite au Vénezuela os pouvons tout d'minme mier* eute coeuse eq chés flaménts roses ; eq chés dés bétails protégés la bos étou* !  Nouzote aussi in Europe os ons yeu inne crise économique , a n'est pour cho qu'os mingeoéme chés flaménts roses .
Chés 2 fréres qu'is braconnoait't is nn'ont té quitte pour éne chintaine d'heure ed néttiache din un r'fuge animalier

*Aglaver =   Avoir très faim .  S'emploie aussi avec la soif
*Mier = Manger
*Étou = Aussi

J'te mile !

A y est os i sonme tarte à prone ! Si os étes conme mi mérdi passé os avez r'béyé ch'match ed football , ch'étoait chés Français conte chés castagnettes* . Après chu r'pos* à peinne inroéyé* ch'match qu'oz intind "BUUUUT" qu'i déclaque ech commintateu ! Éhh duchmint ch'beurre ch'est poin li qu'i cminde .

ch'l arbite étampi* au miyu d'cho'p plouse i géstcule in foaisant un tchot cassis* aveuc sés main.yes ; oz attind éne coupe d'ésgondes ; et lo, i siffe* un g...rand coeup pour dire qu'éch but i n'est poin valabe . Vlo chés gins din chu stade qu'is brait't alorss éq deux minutes édvant is s'imbrassoait't .

Mais ch'est poin tout' , après ch'étoait ch'tour ed chés castagnettes ed mérquer un but ; mais bin atombé qu'chés 2 arbites du dehors is avoait't élvés leu drapieus pour érfuser ch'but ; i l'étoait hors ju conme is dit't . Pi lo coér un coeup ch'l arbite du miyu tojours li ch'l artisse , i nos r'foait ch'tiot cassis avuc sés main.yes .

Et lo poin tchu-tchute* ch'troésiéme ziu* i l'o pérlé, ch'but i est validé . Lyoris nou gardien , tout étombi i l'éncaisse , i pért' queur ech ballon din sés caisses . Os frons miu l'prochain coeup ; ch'troésiéme ziu sro poin tojours alinconte ed chés bleus .


*Castagnettes = Espagnols
*Rpos = Repos
*Inroéyer = Commencer
*Étampi = Dressé
*Siffe = Siffle
*Poin tchu-tchute = Pas de discussion possible
*Ch'troésiéme ziu = La vidéo

Intique intasse ...

Os sonme ech preume d'Avri , mais cha n'est mie d'pichon qué j'va vos causer in-nhui mais d'bétail vrimeux* , pour seur qu'est inne histoére vraï !
Ch'est pus fort éq mi , j'n a poin pus m'impécher d'ém dire eq si ch't honme i l'éroait coér été vivant oz y-éroait dmindé . " Alors' , cmint qu'a vo après inne paréle décarsure * ?? Pi j'éroais bien maginé qu'i m'réponch' : Vintchousse ; j'ai yeu keu.ye i foait éne rute fournaise din ch'python " Al est fin rétuse* ém n'histoére , hein !! Mais n'cachez poin d'raport avu ch'volcan ! I nn'o poin !!!

Akbar ch'l Indonésien i n'rigolero pus li ; minme a min ju d'mot pourit ; i est défuncté ch'paure honme ! Aténdis qu'i l'oeuvroait din eune plantation houlée* d'palmiers i s'a foait ahouper* pér un python ed pus d'7 métes ed long . Ch'bétail i l'o intortillé , étranné , étouffé , pi i ll'o inglouti tout intier . S'famille , ész 'amis is cminchoait't a guériner dé n'poin vir Akbar s'abouler ; is s'sont mis a cacher après , is ont cminché pér démucher inne botte , pi d'z outieus ; pi quante is ont vu au loin ch'bétail vrimeux avoéc inne panche conme un tonnieu , is ont tartous comprins ch'malheur .
Is ont décopé l'pieu.ye dé ch'serpént pour saquer ch'corps dé ch't honme ed 25 ans !

Vlo ! Est un molé lugube ém n'histoére ! Mais  s'mainne qu'i vient os nn'érez eune pus régalante . Ch'est un papar ed 6 moés qu'i s'a foait péquer din eune arnitoéle d'érignie géante !
PICHON D'AVRI !!!!!!! Soin, pichon d'avri foque pou ch'l histoére dé ch'l érignie ! pou ch'python ch'est malheureusmint l'vérité vraï ! Os pouvez raviser cho'v vidéo qu'al torne in blouque su l'arnitoéle !
J'ai coési dé n'poin l'métte inn'o daucuns qu'is pourroait't quair faibe !

*Vrimeux = Venimeux
*Décarssure = Employé dans le sens de mésaventure pénible
*Rétuse = bélotte
*Houlée = Remplie
*Ahouper = Attraper en passant

És'z échecs pour réussir

O ti du sén d'éte mat' à ch'ju lo ?
In tout lés cas chu champion du monne Kasparov li, i né ll'é poin mate ; a sroait minme putôt un rute travailleu !
Qué raport qu'i peut bien y-avoér inter chés échecs pi pus d'un million d'tchots Africains !...

Kasparov li i nn'in démort poin i veut apprinde in moins d'chonq énnés à tous chés margats a s'éjuer a s'ch'ju la pour qu'is prind'té confiance in eux , et pour qu'is seuch'té prinde chés boénes décisions din leu vie .
peut qu'manquer cha n'coute é-rien d'éssayer , ch'est eune idée conme inn'eute pi cha n'coute poin miroule *

*Poin miroule = Pas beaucoup

Cha m'gratte !

Timpe au matin j'ém déhale din cho's salle éd bain , ch'est tours mi ch'preume a l' déjouque , pi lo posé su l'amérette * n'y avoait inne boéte avoéc un cat d'sur qu'i m'érguettoait avuc dés ziux d'cat poursuit . Tchurieux conme inne maguette ej l'ouve , et j'tombe d'sur inne boutéle fin rétuse * ; ch'étoait éne boutéle ed sin boin , j'érbéye ch'l étiquette aveuc chés aspliques qu'is m'dit't eq ch'est un parfum aveuc un sintimint "d'fourure de chaton" .

I sanne à vir eq chés tchots cats is euch'té jusse driére leu co * un sintimint fort agréabe , eune odeur qu'a rassure .
J'a don décidé d'm in métte un molé ... Bernique ! J' ma dégratté ll'ong du jour conme un tchien maqué d'puches .

J'm avoais pu rapplé qué j'n incorsoais mie chés poilles ed cat .
Cha alors !!!

*Amérette = Petite armoire
*Rétuse = belotte
*Co = Cou
*Incorser = Supporter

Os avez dmindé la police ...

N'quittez poin !... Incroéyabe histoére qué j'va vos conter la ,pététe qu'os nn'avez seurmint intindu pérler . Cha s'passe din l'Oise (60) mais qu'importe ; ch'est l'histoére d'eune tchote guérnoule ed 4 ans a peinne , atandis* qu'es mére al étoait pérti foaire quique commissions , cho'ch chipie lo al o prind ch'téléphone pi al o foait ch'17 du maniére qué s'mére a y-...i a montré qu'i falloait qu'a foaiche in cas d'danger . 

Mais lo , tout aller pour lé miux ch'est foque qu'al s'innuyoait , et qu'al avoait invie d'pérler à quéqu'un ; et patati et patata , pi curieuse conme inne canule* et inne langue qu'a nn'est poin maite .A y-a tnue l'crachoére pindant cazi inne heure .

Mais tout in berdlant ch'policier i l'o dmindé à sés collègues ed prévnir cho'm mére qu'a rinte rondébilis a s'baraque . In arrivant a nn'est résté conme deux ronds d'flan ed vir és fille in train d'caqueter avu ch' cadoreux* . Qué wépe ! Tours* est ti qu'és mére a s'a foait rut'mint sérmoné d'avoér laissié s'fille tout seu .

*Atandis = Pendant
*Canule , canulant = Ennuyeux , fatigant
*Cadoreux = Gendarmes
*Tours = Toujours

Ch'crai-on* qu'i pérle ...

Vlo ichi eune biéle invintion pour tous chés éléves qu'is sont disléxiques . Eune sociéte al o invintion.né un stylo éléctronique pour chés tchots pi chés grands qu'is ont do'p peinne pour lire o bien qu'is s'bérlur'té din chés léttes .

Est simpe conme bonjour ; i feut passer cho'p pointe lumineusse dé crai-on su ch'tésque* pi ch'ti-chi* i s'mét à dviser à voéx heute .... Cha n'mérche poin ta-seulmint pou l'Français , mais étou pour l'Inglés ; l'Allmand ; pour cho'b botte* et chés castagnettes* .
Pi ch'est poin toute , pour chétlo*qu'is pass'te un égzamén et qu'is veut't ête trinquille , is peut'té brancher dés titchots écouteurs su ch'crai-on pour intinde chés mots pi n'poin échouir chés gins .

*Crai-on = Crayon
*Tésque = Texte
*Ch'ti-chi = Celui ci
*Cho'b botte = L'Italie
*Chés castagnettes = Les Espagnols
*Chétlo = Ceux la

Oz éte bien su " tweet'tueur "

Twitter ch'est un mot qu'est à la mode. Mais soin tertous chés réseaux socials un jour ou l'eute is peut'té s'értorner conte-vouzote ; i feut savoér don.ner un coeup d'ramon dvant sin pos d'porte !
Ch'est ch'coeup d'malsaveur* qu'est arrivé à un journalisse Améritchain .

Adon el 15 déchémbe 2016 chu fameu journalisse i l'étoait à s'maison bin a l'coyette . Quand tout  a coeup "bip..bip..bip.." i r'cheut un méssache su sin compte "twitter" ; i l'l ouve , et lo , CRÉNON DES Z'OS eune leumiére STROBOSCOPIQUE a s'déssaque ed sin téléphon.ne pi al vient li provoquer inne crise d'épilépsie .

  D'après chu "New-York time" cha sroait inne gin qu'a l'éroait poin incorsé* qu'chu journalisse i diche* du mau dé ch'canard* ed cho'm maison blanque !
Conme d'éffet , ch'est bien l'premiere foés qu'un méssache ed réseau "sociau" i l'est invoéyé pour affoler* quiqu'un .

Din qué monne oz vit !

*Coeup d'malsaveur = Coup malheureux , mauvais coup du sort
*Incorser = Supporter
*Diche = Du verbe dire

*Ch'canérd ed cho'm maison blanque (Donald, le président Américain

*Affoler = Blesser

Feusse alerte !

El 5 mars dérnier "les frelons" clup' ed rugby a 13 ed Sauveterre de Comminges in Haute Garonnes ; is n'ont poin put juer leu match ! Pourquoé ? Ben a coeuse d'inne alerte orange a ch'l hérnu* .

D'après intinde dire inne gin qu'i oeuve a cho'p préfecture " Tous chés matchs du wouiquéne qu'is sont jués déhors is sront annulés " ...fut dit fut foait , ech maire i l'o volu prin...ne aucun risque ! I l'o don tout annulé !!

Os éroéme pu n'in réster la !! Seuf qué l'linnemain ch'maire i l'o apprind qu'i n'y avoait poin pus d'alerte orange , qué d'puches su l'dou* d'no tchien ! ...Qué l'infilure* ! N'y o vraimint dés gins qu'is sont farces !! Pi surtout qu'is n'ont rin d'eute a foute !

*Hernu = Orage
*Dou = Dos
*Infilure = Ruse

Pi quoé nn'in foaire !

Vlo ch'l érnouvieu qu'i s'aboule , ech boin temps quoé !! Cha r'est l'momint d'fouir sin gardin , j'espere qu'os n'déteuprez  poin un blockhaus conme un Breton qu'i l'o foait !!

Autant vos dire qu'i nn'est resté tout ébeubi* ed vir cho in plein mitan d'sin courti . Quoé qu'i l'alloait bien pouvoér n'in foaire ? L'érvinde à chés verts-dé-gris* ? Angélla cha pourroait i ...foaire és 'balle , vu qu'in ch'momint a n'in voét dés ruses avoéc chés Turcs !
Marchez; no Breton i s'o poin imbaraché, i l'o yeu l'idée d'agincer sin blockhaus in champignonniere !

Pér qué saint i l'o don busié* à éne chose parél ? Probabe qu'i s'ara dit a pért li* : Blockhaus = Guerre = guerre nucléaire= Hiroshima = Champignon = Champignonniere !! Ben quoé ! A s'tient !! LOL
Allez vos in vir ch'qu'i s'passe din l'cawoéte din Breton !!!!

*Ébeubi = Ebaubi , Etonné
*Verts-dé-gris = Couleur de l'unforme militaire Allemand
*Busié = Pensè
*A pért li = En lui même

Ad'ou qué j'su ?

Oz nn'in voét d'drole din s'monde os savez ! A vos a chértainemint djo arrivé d'apporter un molé d'ayude à un paure * horzin *pardu qu'i cachoait pér après sin cmin din vo poéys !
Souvint chés gins qu'is dmind'té leu cmin is sont in auto , o bien vélo moteur a mzure
...
Au Kazakhstan n'y o un honme qu'i rouloait d'sur éne route acouftée d'neiche , cha quaisoait* à gros FLACONS ( conme oz dit amon séphora) ... M'ouais !!!! Quante tout a coup i l'o vu à éne chintaine ed métes es'poser un hélicoptére jusse sous l'néz d'un camion . Ch'pilote i s'déssaque dé s'n engin, chapka su s'cawoéte * pi s'in vo dviser pi gestitchuler * a ch'cassis dé ch'camion ; et a vir cho'd direction qu'i l'indiquoait oz advine bien qu'i dmindoait sin cmin .
Eune foés tous chés diries* términés , ech pilote i l'érmércie ch'chauffeur dé ch'camion , i s'rintique din s'n hélico , et i r'prind s'route !

J'a idée qu'si un jour oz voét cho in France , i n'feuro poin oblier d'rajouter dés nouvieux panneaux ! Népoint !!

Paure = Pauvre
*Horzin = Etranger au village
*Quaisoait = tombait
*Diries = Paroles

Record à cho't tour Eiffel

Éh ben nan ! Chu r'cord i n'sro mie battu pour cho't troésiéme édition ed "la veticale de la tour Eiffel" . Ch'est inne épreuve ouéche qu'i feut monter el pus vite possibe chés 1665 marches ed la tour .

N'y-o poin yeu d'surprise ch'est coér un Polonais qu'i ll'o guégné pou l'troésiéme énnée d'affilé . I l'o mis 7 minutes et 54 ésgondes ; mais i n'o poin battu sin r'cord ed 7 mn 48s .
Pour chés fénmes ch'est eune Austraïéne qu'al o guégné , al o ...minme amélioré sin r'cord ed 14 s , al o mis 9 mn et 34s .

Ed tout sén* , pour inne Austaïéne, cha n'est mie 'tonant* qu'al euche guégné al ara du foaire éd z'ébondis d'kangourous !!


* Ed tout sén = DE toute façon

Quoé qu'i dit ch'co !!!

Ben i dit cocorico !! Cha foait 8 coups qu'chés Français is guégne'te* cho'c coupe du monne ed chés gatieuw . 8coups d'sur 15 , ch'est bien tout l'monne n'el foait poin !

Is ont guégné aveuc inne piéche in chuque ...trés rock ! ...
In preume i o ch'grateu d'payelle* caveux pi croate din ch'vint avoék inne casaque in tchuir acouftée d'roses in chuque . Ech musichien (conme diroét Dany Boon) i l'est achuchonné* d'un batteur (poin ch'robot pour fouére chés blancs in neiche) ..nan, un musicien , li , i est in chucolat et in pilcorps* afistolé* d'un jean qu'oz diroait un vrai !

*Guégne'te = Vient de GAGNER
*Grateu d'Payelle = Guitariste
*Achuchonné= Accompagné
*Pilcorps= Torse nu
Affistolé = Accoutré

Voéyache din chés profondeurs

Edvant d'écmincher min billet , j'va vos poser eune édvinette Os savez ti pourquoé quante un batieuw i coule ech capitaine i crie " Les femmes et les enfants d'abord" ? Oh cha n'est poin pér galantrie obien toute forme ed politesse ... Nan , ch'est pachque si feut nager 5 ou 6 métes edvant d's incrinquer din cho'ch chaloupe chés requins is sront djo bien rasasiés... !! I n'minque poin d'gingin ch'capitaine !

Si j'édvise ed batieuw qu'i coule ch'est qué j'va vos pérler d' chu TITANIC . In 2018 n'y o dés gins qu'is pouront visiter cho'c carcasse ed " l'insubmersible" ...Sié ch'est conme cho qu'is l'apploait't . Maginez un voéyache ed huit jours din dés avinteurs* du diape . Pisqu'i feut déchinde à 3 800 métes . Eune foés in bos* chés visiteux is front l'tour dé ch'batieuw avoéc un molé d'asplique su l'maniére ed naviguer un mastodon parél .
Feuro raquer 105 000 € pou cho'v visite ... Hein !? Os treuvez qu'ch'est quér ??
Marche , ch'est quand minme poin la mér à boére !!

*Avanteur = Profondeur
*In bos = En bas

I nn'o qu'is l'ont belle !

Bah , conme diroait Carole , la ch'est l'bouquet !
Oz voéro d'toute  din s'monne . N'y-o un prince Saoudien qu'i o poayé 80 billets d'aréoplane pour sés faucons ; attindez ch'est poin toute .Mi au début j'pinsoais qu'i l'avoait réservé ch'l aréo rin qu'pour li !
...
Pinsez vous ... chés bétals is ont voéyagés avuc chés gins conme ti pi mi quoé !
Is leu z'avoait't quaind minme acouftés leu tiéte avoék éne sorte ed bonnet qu'a m'a l'air d'éte fin solide (probabe éq ch'est la marque Aigle) !! Pour poin qu'chés bétals is seuch'te effoayés* !
 

*Effoayer = Effrayer

Dés pétotes sur MARS...

Au moins si un jour os éte capultés mon chés martiens os érez tours* dés patates à mier . Slon chés blouses blanques ed potato centre au Pérou i est possibe ed fouére pousser dés peumes-é -terre sur Mars .
Din eune éspéce ed boéte is ont r'produit cho't terre qu'i o la heut , cho't témpérature , cho'p préssion , pi tout ch'réstant !
Et la , alélouya ! chés pétotes is pouss'te ! PURÉ ! j'érai pon cru !

*Tours = Toujours

Chés bétails qu'is vos rind'te heureux

I sanne a vir eq din chés camps i-y éroait  ed moins in moins' ed pork-é-pic = d'z hérichons si os voulez ! Allez savoér à coeuse ? Ej rappel eq chés z'hérichons pi chés oursins ch'est lés seul bétails qu'is né s'léqu'té poin pou s'décraper !!

Mais ch'est mie d'cha qué j'veux vos causer in-nhui ! Amon chés Californiens éne étude ed la BBC al o ...prouvé equ'd erbeyer d' z érportages "animaliers" cha nos rind pu z'heureux , raport à chés gins qu'is ravis'té sécants* dotchumintaires , o bien dés fimes qu'is nos foait'té tranner lés berbettes* . O bien coér dés fimes ed guerre .

J'ai idée qu'i o poin qu'd érbeyer dés bétails qu'is rind chés gins heureux . J'n in connoais dautchuns* qué ch'premier sémdi du moés d'sur inne chaine brouillé.ye qu'is sont fin heureux étou !

*Qu'i euche = Qu'il y ait
*Sécants = Quelques
*Tranner lés berbettes = Trembler (ici trembler de peur)
*Dautchuns = Certains

Quoé qu'al attind ?

Quoé qu'oz attind a l'veille ed sés chint ans ? os savez ch'que ch'est qu' attinde ? Oz attind ch'train quant qu'oz est su ch'quaï . Ch'est vagances quant qu'oz est tchot . L'értaite quant qu'oz est viux . Un éfant quant qu'oz est mérié . Oz attind tojours quétchose din la vie

Mais lo ; a ti du sén d'vouloér s'n aller au violon* én fuche qu'eune nuit ? ...Ma pinse ; ch'est  cho qu'inne Hollandaise ed 99 ans d'age al rêvoait d'foaire edvant d'mourir . Bé , a n'est poin aisié , i l'o fallu qu'al foaiche dintier* chés cadoreux un rute momint edvant qu'is s'décid'te éd'l inclaner* pour inne nuit mon ch'comissariat , pi menotée coér ! ....Bon ben , cho ch'est foait !!!

*Au violon = En prison
*Dintier = Taquiner , provoquer
*Inclaner = Enfermer

Fleurimont long minton

Acoutez ichi eune boéne tchote histoére in Picard

Chés curés "font du ski"

Aprés chés bronzés ch'est chés curés qu'is foait'té du ski .Hormis qu'chés curés , euss is fsoait't édjo du ski bien edvant qué ch'fime i sort' .

Conme tout l'z an al minme époque au Get in heute Savoie va s'étnir el challénge Alfred Delavay pour el 56 ém édition ....
70 Prétes , Diacs, o bien Pasteurs , vnus d'France , dItalie o bien d'Suisse , is vont s'értreuver in-nhui* pour l'épreuf' du ski d'fond ( in soutane) ...Et n'main pour chu slalom géant , a noter qu'chés cafards* is sront poin in soutane pour foaire leu déchinte , sin cha is pouroait't s'involer conme un vulguére dragon *

ALÉA JACTA EST !! 

*In-nhui = Aujourd'hui

*Cafards = Sobriquet a cause de la soutane noire
*Dragon = Cerf volant

Chocolatine o bien ...

L'France al est copé in 2 ; n'yo ceuss qu'is dit't inne chocolatine pi lés z'eutes qu'is n'jur'té qu'pér un pain au chocolat .
Amon chés japonés conme tertous i l'sait ch'est " Nippon ni mauvais " is ont saqué ch'ridieuw , abolis tous chés nunutries la . Asteure si qu'os allez à Tokyo din eune boulingerie i vous feuro* dminder inne CHOCOLATINE .
...
Ed tout lés maniéres , mi j'dis ni l'un ni l'eute , a coeuse eq nouzote os ons tojours dit " un p'tit pain au chocolat " . Cha m'raminteuve* quante j ai quitté chés heuts d'France pou m'n aller vive inne coupe d'énnées din ch'sut' . Quante os rintroéme din eune boulingerie mi pi min blanc bonnet pi qu'os dmindoéme dés p'tits pains au chocolat ; cho'v vindeuse al nous donnoait dés MINIS pains choco...os savez chés miniatures !

Marche , ch'est chés screts d'chol gué-guére linguistique NORD - SUD

*Feuro = Faudra

*Se ramintuver = Se souvenir , se rappeler

Boéte à pringére*

A ch'bout d'l énnée 2017 probabe qu'os voérez fleurir chés boétes lo un molé tout pértout din chés aires d'érpos d'chés autoroutes . Soin; n'vos berlurez poin si os avez dés photos d'idintités à prinde ...passez vou cmin , a n'est mie foait pour cho !

Ch'est deux Normands qu'is ont invintioné cho'b boéte à siéste ....
In d-din ch'est eune tchoté-cambe ed 2 méte carré, inn tchoté-commode , un porté-mantieus , et inne prise ed courant . Pi ch'est poin toute : Eune leumiére rouge pour qu'os n'seuchéche poin épinés* au momint d'vos indordler* ; et avoék cho un plafond houlé* d'étoéles pour qu'os ayéche inne impréssion d'GRAND .
Pi quante varo * l'momint d'vos écaniller* ch'est inne leumiére bleuse qu'al varo invahir cho'c cambe avoék éne nuée d'sin boin * qu'i quairo dé ch'plafond pour raboénir * l'air ed cho'b boéte edvant d'atcheullir éne eute pratique * .
J 'vos ai ti dvisé dé ch'prix ? Pour 6€ os couquerez 30 minutes ; et ch'est a l'avnant si os i passez la nuit ! Ch'est poin donné ! J'ai idée qu'is nn'o coér gramint qu'is vont deurmir din leu carette

*Pringére = Sieste
*Epiné = Enervé
*Indordler = Endormir
*Houlé = Rempli
*Varo =Viendra
*Ecaniller = Reveiller
*Sin boin = Parfum
*Raboénir = Rendre meilleur
*Pratique = Client

Ch'preume ...

Cha vo ti més gins !  Ech'premier , pachqu'i feut qu'i y-euche un preume  , poin vrai ?!

Ch'ti journal in Picard ... Qué j'vos nn'in cause un molé ; pour sur qu'i n'y ara poin tous chés infos qu'os pouvez lire din vo gazette au matin a l'pointelette , cha sroait d'trop long pi j'vos rabâcherais dés choses qu'os savez déjo !  Nan, mi j'va vos r'traduire in Picard , in patois si qu'os ainmez miux tous chés z'insolites , chés bizarries qu'i s'passe din l'monne pi qu'cha vos érez  écappé !

Minme si pour d'autchuns os éte ed z'éspécialisses in Picard , cha n'est mie l'affoaire ed tertous , pour se foaire pi pour vos bailler un molé d'asplique , a ch'bout d'min billet ej méttrais un titchot  ( *) aveuc  chés sinifienches au coté pour qu'os comprindéche miux .

N'hésitez poin dé m'laissier un commintaire in Français , o bien in Picard ed vo poéys , cha m'fro plaisi .

Adé més gins , a nos r'lire .                       Ez'Zéf